MAIN TERA NAAG, TU MERI NAGIN CHOWRANGI!

Wah! Kya naam hai. Nagin Chowrangi. Aksar yahan se guzarte huwey main ye sochta hoon ke banday ke dil main janey kya aya tha ke is ka naam Nagin Chowrangi rakh chora. Guzre zamaney ke log shayed buhut hee seedhay aur bholey hotey hongey.

Lekin main lakh koshish karloon, samajh naheen ata ke kya kahani hai is naam ke peechay. Nagin Chowrangi. Zara sochiye, kya pooray Karachi main kaheen aisey ya is jesey naam ki koi jagah hai? Har jahah kisi insaan ke naam pe hai. Zinda ya murda, insaan hee hain. Hasan Square ko hee dekh lee jiye. Udher Sher Shah bhi hai. Aisha Manzil bhi hai Karachi main. Kabhi naam ke saath main laqab bhi lag  jata hai jesa ke Sakhi Hasan. Buhut sakhi they becharay. Allah jannat naseeb karay. Naam de gai. Is se ziyada aik insaan kya de sakta hai apna? Sab se barh kar naam hee hota hai. Naam bura ho to kaam bhi buray hee hotay hain. Lekin Nagin Chowrangi?

Sochta rehta hoon ke akhir wahan aisa kya waqaiya pesh aya? Kia wahan kisi ne koi nagin dekhi thee? Aur kya itney qareeb se dekhi thee ke pakka ho gaya ke nagin hee hai? Naag bhi ho sakta tha. You never know! Akhir hum main se kitne log hain jin ko naag aur nagin ki pehchan hai? 5? Steve Irwin to Pakistan anay se raha. Allah bakshish karey uski. To bhaiyya hum main se koi 5 6 log hee hongay jin ko samajh boojh hogi naag aur nagin ki. Woh bhi agar parhne waloon main 5 6 saperay aur jogi shamil hoon to. To phir Nagin hee kion? Naag kion naheen? Buhut sexist naam hai Naagin Chowrangi. Saanp Chowrangi bhi keh saktay thay.

Nagin chowrangi, ab chowrangi naheen rahi. Ab ye Nagin intersection ban gaya hai. Wah… aik aur haseen ittefaaq dekhiye. Nagin koi mouannas (female) aur interchange huwa muzakkar (male). Nagin Intersection apni sexuality ke baray main confused hai thora/thori si. Lekin salam hai sahab Mustafa Kamal bhai ko. Kya nagin jesa bal khata intersection banaya hai.

Lekin baat yeh hai ke Naag aur Nagin, donoon hee insaan ke jani dushman hain. MOUZI JAANWAR! Jahan dekho forun maardo. Aur woh hamain jahan dekhain foran dus lain. Bilkul siyasatdaanoon ki tarah. Saanp aur Siyasatdaan, donoon hee mouzi jaanwar hain. Donoon ko doodh pilao phir bhi wafadari naheen karte. Saanp se acha to kutta hota hai. Wafadar aur paaidar. Doodh naheen peeta. Doggie treats chahiye kuttoon ko. “Kutta Chowrangi” rakh dete naam? Aray main kehta hoon poora animal kingdom para huwa hai. Cheeta Chowrangi rakh dete? Zebra Chowrangi rakhtay? Billi, chooha, sher, haathi, lomri, chirya, kawwa kion naheen rakha?

Akhir yeh Nagin Chowrangi ka chakkar kya hai?

Source:http://www.roznamajawani.com/?p=388